Փոդքասթ - Անկյունային դեֆորմացիաներ
Կրթական նպատակներ
Դասախոսության արդյունքում մասնակիցները պետք է կարողանան`
- Հասկանալ երեխաների մոտ անկյունային դեֆորմացիաների բնականոն զարգացումը, ներառյալ genu varum-ը (աղեղնաձև ոտքեր) և genu valgum-ը (X-աձև ոտքեր), և իմանալ դրանց վերականգնման ակնկալվող ժամանակացույցը
- Բացահայտել անկյունային դեֆորմացիաների վտանգի ազդանշանները, ինչպիսիք են ասիմետրիան, կաղությունը, ցավը և ոչ բնականոն աճը, որոնք կարող են վկայել հիմքում ընկած հետագա գնահատում պահանջող ախտաբանության մասին
- Ախտորոշել և բուժել անկյունային դեֆորմացիաների հետ կապված վիճակները, ներառյալ ռախիտը, հիպոֆոսֆատեմիկ ռախիտը, Բլաունտի հիվանդությունը և սրունքի սուսերաձև դեֆորմացիան, և հասկանալ դրանց հատուկ կլինիկական նշանները և ախտորոշիչ չափանիշները
- Ուսումնասիրել անկյունային դեֆորմացիաների ժամանակակից բուժման տարբերակները, ներառյալ հեմիէպիֆիզիոդեզը և այլ նվազագույն ինվազիվ մեթոդները, ինչպես նաև հասկանալ, թե երբ կարող են պահանջվել ավելի ինվազիվ միջամտություններ, ինչպիսին է օստեոտոմիան
- Սովորել երեխաների մոտ Կոնքազդրային հոդի զարգացող դիսպլազիայի (DDH) սքրինինգի և վաղ հայտնաբերման կարևորությունը, ինչպես նաև սովորել ինչպես իրականացնել առանցքային ախտորոշիչ մանևրները, ինչպիսիք են Բարլոուի և Օրթոլանիի թեստերը
- Գնահատել DDH-ի ուշ ախտանիշները, ինչպիսին է Գալեացցիի նշանը, և հասկանալ, թե ինչպես են այս նշանները ուղղորդում հետագա ախտորոշիչ պատկերավորումը և օրթոպեդիկ բուժումը
Թիրախային լսարան
Դասընթացը նախատեսված է մանկաբույժների, ընտանեկան բժիշկների և օրթոպեդ-վնասվաածքաբանների համար։
Դասընթացի նկարագրություն
Այս թողարկման մեջ բժիշկ Էյալ Բեն-Այսեքը և բժիշկ Ալեքսանդր Վան Սպեյբրուկը կքննարկեն մանկական պրակտիկայում հանդիպող անկյունային դեֆորմացիաները՝ կենտրոնանալով genu varum-ի (աղեղնաձև ոտքեր) և genu valgum-ի (X-աձև ոտքեր) վրա։ Նրանք կխոսեն այս վիճակների բնականոն զարգացման, դրանց վերականգնման ժամանակացույցի և ախտորոշման հիմնական չափանիշների մասին։ Թողարկման մեջ կլուսաբանվեն հիմնական «կարմիր դրոշակները», ինչպիսիք են ասիմետրիան, կաղությունը և ցավը, և անդրադարձ կկատարվի բուժման ժամանակակից այնպիսի մեթոդներին, ինչպիսին է, օրինակ, հեմիէպիֆիզիոդեզը։ Բացի այդ, քննարկումն կընդգրկի հարակից այնպիսի վիճակների բուժումը, ինչպիսիք են ռախիտը, հիպոֆոսֆատեմիկ ռախիտը, Բլաունտի հիվանդությունը և սրունքի սուսերաձև դեֆորմացիան։ Թողարկման մեջ անդրադարձ կկատարվի նաև Կոնքազդրային հոդի զարգացող դիսպլազիային (DDH)՝ ներառյալ սկրինինգի մեթոդներին, ռիսկի գործոններին և ախտորոշման մոտեցումներին՝ կենտրոնանալով օբյեկտիվ զննման միջոցով վաղ հայտնաբերման վրա՝ օգտագործելով Բարլոուի և Օրթոլանիի մանևրները, և ուշ ախտանիշների ճանաչումը, ինչպիսին է Գալեացցիի նշանը։ Այս թողարկման նպատակն է տալ բժիշկներին հիմնական գիտելիքներ անկյունային դեֆորմացիաների վաղ ճանաչման, ախտորոշման և բուժման վերաբերյալ, ինչը կբերի ավելի լավ բուժական արդյունքների պացիենտների մոտ։
Գիտելիքի գնահատում և ՇՄԶ կրեդիտների շնորհում
Այս էպիզոդից Հայաստանում ՇՄԶ կրեդիտ ստանալու համար անհրաժեշտ է հաջողությամբ հանձնել էջի վերջում տեղադրված ՇՄԶ թեստը: Անցողիկ 70% հավաքելու համար Ձեզ տրվում է 3 փորձի հնարավորություն: Թեստը հաջողությամբ հանձնելու դեպքում մենք կրեդիտների հետ կապված անհրաժեշտ ողջ ինֆորմացիան կտրամադրենք ՀՀ Առողջապահության նախարարությանը և Ձեզ կտրամադրվի համապատասխան վկայական։
Բժ. Ալեքսանդր Վան Սպեյբրուկ
Բժիշկ Ալեքսանդր Վան Սպեյբրուկը, MD/MPH, Լոս Անջելեսի Մանկական հիվանդանոցի Ընդհանուր մանկաբուժության բաժանմունքի մանկաբույժ է, որտեղ նա աշխատում է որպես Spina Bifida ծրագրի բժշկական տնօրեն և Գլոբալ առողջապահության IMPACT Track ռեզիդենտուրայի ծրագրի համատնօրեն։ Նա նաև հարավային Կալիֆորնիայի Համալսարանի Կեկի անվան բժշկական դպրոցի մանկաբուժության կլինիկական պրոֆեսոր է։ Մանկաբուժության ոլորտում հավաստագրում ստացած բժիշկ Վան Սպեյբրուկը մասնագիտացած է Լոս Անջելեսի Շրայների մանկական հիվանդանոցում Spina Bifida, մկանային դիստրոֆիա և մանկական ուղեղային կաթված ունեցող երեխաների խնամքի ոլորտում։ Նրա փորձը առողջապահական ոլորտում ներառում է բժշկական առաքելություններ Մեքսիկայում, Էկվադորում, Էլ Սալվադորում, Նիկարագուայում, Մոնղոլիայում, Վիետնամում և Գվատեմալայում։ Նա ակտիվորեն ներգրավված է Spina Bifida ունեցող երեխաների խնամքի մեջ և ծառայել է որպես անդամ, դասախոս և հետազոտող Spina Bifida ասոցիացիայում և ԱՄՆ Հիվանդությունների վերահսկման կենտրոններում։ Նա ստացել է իր բժշկական կրթությունը Բոստոնի համալսարանի բժշկական դպրոցից և հանրային առողջապահության դպրոցից և ավարտել է իր ինտերնատուրան և ռեզիդենտուրան Լոս Անջելեսի Մանկական հիվանդանոցում։ Բժիշկ Վան Սպեյբրուկը բազմաթիվ մրցանակների դափնեկիր է, ներառյալ Լոս Անջելեսի Մանկական հիվանդանոցի Հումանիզմի մրցանակի թեկնածու և Շրայների մանկական հիվանդանոցի 10-ամյա ծառայության մրցանակը։
Բժ․ Վահե Յավրյան
Բժ․ Վահե Յավրյանը բարձրակարգ մանկական օրթոպեդ վիրաբույժ է՝ ավելի քան երկու տասնամյակ փորձով, ով ներկայումս զբաղեցնում է «Արաբկիր» բժշկական կենտրոնի մանկական օրթոպեդիայի բաժանմունքի վարիչի պաշտոնը, ինչպես նաև հանդիսանում է ՀՀ ԱՆ խորհրդատուն մանկալան օրթոպեդիայի գծով: Նա մանկաբուժության դիպլոմը ստացել է Երևանի Մխիթար Հերացու անվան պետական բժշկական համալսարանից և անցել է մանկական օրթոպեդիայի մասնագիտական լայնածավալ վերապատրաստում՝ ինչպես Հայաստանում, այնպես էլ արտերկրում։ Դոկտոր Յավրյանը մի շարք մասնագիտական կազմակերպությունների ակտիվ անդամ է և բազմիցս ներկայացրել է իր գիտական աշխատանքները և կլինիկական փորձը՝ տեղական և միջազգային համաժողովներում։ Նրա մասնագիտական փորձը ներառում է մանկական նեյրոօրթոպեդիկ հիվանդությունների բուժումը։
