Փոդքասթ - Լայմի հիվանդություն
Կրթական նպատակներ
Դասախոսության արդյունքում մասնակիցները կհասկանան, թե`
- Ինչ է Լայմի հիվանդությունը, ինչ հարուցիչ է այն առաջացնում և ինչպես է վարակը փոխանցվում մարդուն
- Ինչպես ճանաչել հիվանդության տարբեր փուլերում առաջացող ախտանշանները, ներառյալ՝ թափառող էրիթեման, սրտային և նյարդաբանական դրսևորումները
- Ինչ քայլեր պետք է ձեռնարկել տզի խայթոցի հայտնաբերման դեպքում՝ ներառյալ տզի անվտանգ հեռացումը, խայթոցի վայրը մշակելը և մասնագետի դիմելու անհրաժեշտությունը
- Ինչպես է իրականացվում Լայմի հիվանդության շճաբանական երկփուլ ախտորոշումը
- Ինչպես կարելի է կանխել տզի խայթոցները և ինչ բուժում է կիրառվում Լայմի հիվանդության վաղ փուլերում
Թիրախային լսարան
Այս առցանց դասընթացը նախատեսված է մանկական վարակաբանների, թերապևտների, ընտանեկան բժիշկների, վարակաբանների, նյարդաբանների և մաշկաբանների համար:
Դասընթացի նկարագրություն
Այս պոդքասթը ներկայացնում է Լայմի հիվանդության՝ հայտնի նաև որպես տզային բորելոզ, համապարփակ պատկերացումը։ Զրույցը սկսվում է հիվանդության էության բացահայտմամբ՝ անդրադառնալով հարուցիչ բորելիա բակտերիային, վարակման մեխանիզմներին և Իքսոդային տզերի միջոցով մարդու վարակման գործընթացին։ Քննարկվում է նաև հիվանդության տարածվածությունը աշխարհում և Հայաստանում, ինչպես նաև դրա համաճարակաբանական առանձնահատկությունները, ներառյալ՝ սեզոնայնությունն ու տարածման գործոնները։
Առանձին ուշադրություն է դարձվում տզի խայթոցի հայտնաբերման դեպքում ձեռնարկվող քայլերին։ Քննարկվում է՝ ինչպես անվտանգ հեռացնել տիզը, ինչպես մշակել խայթոցի վայրը և ինչու է կարևոր այն հանձնել Հիվանդությունների վերահսկման և կանխարգելման ազգային կենտրոն՝ հետազոտության նպատակով։ Ներկայացվում է նաև բժշկի հետ խորհրդակցության անհրաժեշտությունը, նույնիսկ եթե առաջին փուլում ախտանշանները չեն նկատվում, ինչպես նաև՝ տզին ինքնուրույն հեռացնելու հնարավոր ռիսկերը։ Զրույցի ընթացքում մանրամասնորեն ներկայացվում են Լայմի հիվանդության կլինիկական դրսևորումները՝ ըստ փուլերի։ Վաղ շրջանում հնարավոր է առաջանա բնորոշ մաշկային փոփոխություն՝ թափառող էրիթեմա, ինչպես նաև մրսածությանը նման ախտանիշներ։ Հետագա փուլերում դիտվում են տարածուն մաշկային օղակաձև փաթաթումներ, սրտային բարդություններ (Լայմ կարդիտ) և նյարդաբանական ախտանշաններ։ Ուշ փուլում հիվանդությունը կարող է առաջացնել հոդաբորբ, քրոնիկ հոգնածություն, դեպրեսիա և այլ հոգեկան կամ նյարդաբանական խնդիրներ։ Հատուկ տեղ է հատկացվում բուժումից հետո զարգացող պաթոլոգիական վիճակին՝ Post-Treatment Lyme Disease Syndrome (PTLDS), որը հաճախ շփոթվում է ակտիվ հիվանդության հետ։ Էպիզոդի վերջում ներկայացվում են Լայմի հիվանդության ախտորոշման և կանխարգելման հիմնական մոտեցումները։ Լսողը ծանոթանում է երկփուլ շճաբանական թեստավորման մեթոդին, ինչպես նաև՝ հիվանդության կանխարգելման և վաղ փուլերում բուժման ուղեցույցներին։ Կարևորվում է հիվանդության ժամանակին ճանաչման և ճիշտ բուժման հարցում բժիշկների դերակատարումը։ Այս պոդքասթը նպատակ ունի բարձրացնել իրազեկվածությունը, խթանել կանխարգելիչ վարքագիծը և նպաստել հիվանդության ճիշտ կառավարմանը։
Գիտելիքի գնահատում և ՇՄԶ կրեդիտների շնորհում
Այս դասընթացը Հայաստանում դեռևս ՇՄԶ կրեդիտավորված չէ։ Այս պահին Ձեզ չի տրամադրվի վկայական, նույնիսկ եթե հաջողությամբ հանձնեք էջի վերջում տեղադրված ՇՄԶ թեստը։
Բժ․ Քնարիկ Սարգսյան
Քնարիկ Սարգսյանը վարակիչ հիվանդությունների մասնագետ է՝ կլինիկական աշխատանքի, գիտահետազոտական գործունեության և բժշկական կրթության ոլորտի լայն փորձառությամբ։ Բժշկական գիտությունների թեկնածու Քնարիկ Սարգսյանը ստացել է բժշկական կրթությունը Երևանի Մխիթար Հերացու անվան պետական բժշկական համալսարանում՝ հետագայում ավարտելով վարակիչ հիվանդությունների կլինիկական օրդինատուրան «Նորք» վարակաբանական կլինիկական հիվանդանոցում։
Մասնագիտական կարիերայի ընթացքում աշխատել է Հայաստանի առաջատար բժշկական հաստատություններում։ Ներկայումս զբաղեցնում է Բժշկական ծառայությունների որակի կառավարման ղեկավարի պաշտոնը Վարակիչ հիվանդությունների ազգային կենտրոնում։ Միևնույն ժամանակ հանդիսանում է «Բժիշկներ առանց սահմանների» կազմակերպության նախագծի պատասխանատու մասնագիտական հետազոտող՝ բարձր ռիսկային խմբերում հեպատիտ C-ի հայտնաբերման ու բուժման պարզեցված մոտեցումների ուղղությամբ։
Բացի իր կլինիկական գործունեությունից, դոկտոր Սարգսյանը ներգրավված է ազգային պատվաստման վերաբերյալ կրթական նախաձեռնություններում և դասախոսում է ինչպես «Էրեբունի» բժշկական ակադեմիայում, այնպես էլ Ազգային Բժշկական պալատում։
Ստանձնած բոլոր դերերում նա համադրում է իր մասնագիտական գիտելիքներն ու հանրային առողջապահության նկատմամբ նվիրվածությունը՝ խթանելով ակադեմիական առաջընթացը։ Մասնակցել է ԱՀԿ-ի կողմից կազմակերպված վերապատրաստման ծրագրերի, ներգրավված է եղել կառավարության կողմից ֆինանսավորվող COVID-19-ի հետազոտություններում և ունի 13 հրապարակում միջազգային գիտական հանդեսներում։ Նրա գիտական հետաքրքրությունների շրջանակում են COVID-19-ի կլինիկական և իմունաբանական առանձնահատկությունները և դրա բարդությունները՝ ներառյալ հարակից միկոզները։
Անգլերենին ազատ տիրապետող և ռուսերենին լավ իմացող Քնարիկ Սարգսյանը շարունակում է առաջատար դեր ունենալ Հայաստանում վարակիչ հիվանդությունների դեմ պայքարի գործում՝ թե՛ առաջնագծում բժշկական օգնություն ցուցաբերելով, թե՛ մասնագիտական կրթություն տրամադրելով։
